Holy Virgin Protection Russian Orthodox Church, 301 Handy St., New Brunswick, NJ 08873, USA
 
МЕНЮ
НОВОСТИ ПРИХОДА

7 января (25 декабря по старому стилю)

Рождество Господа и Спаса нашего Иисуса Христа.



Тропарь Рождества Христова.

Рождество Твое, Христе Боже наш,/ возсия мирови свет разума,/ в нем бо звездам служащии/ звездою учахуся/ Тебе кланятися, Солнцу Правды,/ и Тебе ведети с высоты Востока.// Господи, слава Тебе!

Кондак Рождества Христова.

Дева днесь Пресущественнаго раждает,/ и земля вертеп Неприступному приносит,/ Ангели с пастырьми славословят,/ волсви же со звездою путешествуют,/ нас бо ради родися// Отроча Младо, Превечный Бог.

Величание.

Величаем Тя,/ Живодавче Христе,/ нас ради ныне плотию рождшагося/ от Безневестныя// и Пречистыя Девы Марии.

14 января (1 января по старому стилю)

Обрезание Господне и память святителя Василия Великого.

   


Тропарь Обрезания Господня.

На Престоле огнезрачнем/ в Вышних седяй со Отцем Безначальным и Божественным Твоим Духом,/ благоволил еси родитися на земли/ от Отроковицы Неискусомужныя, Твоея Матере, Иисусе,/ сего ради и обрезан был еси, яко Человек осмодневный./ Слава всеблагому Твоему совету,/ слава смотрению Твоему,// слава снизхождению Твоему, Едине Человеколюбче.

Кондак Обрезания Господня.

Всех Господь обрезание терпит/ и человеческая прегрешения, яко Благ, обрезует,/ дает спасение днесь миру./ Радуется же в Вышних и Создателев иерарх,// и светоносный, Божественный таинник Христов Василий.

Тропарь святителя Василия.

Во всю землю изыде вещание твое,/ яко приемшую слово твое,/ имже боголепно научил еси,/ естество сущих уяснил еси,/ человеческия обычаи украсил еси,/ царское священие, отче преподобне,/ моли Христа Бога// спастися душам нашим.

Кондак святителя Василия.

Явился еси основание непоколебимое Церкве,/ подая всем некрадомое господьство человеком,/ запечатлея твоими веленьми,// небоявленне Василие преподобне.

19 января (6 января по старому стилю)

Святое Богоявление. Крещение Господа Бога и Спаса нашего Иисуса Христа.



Тропарь Крещения Господня.

Во Иордане крещающуся Тебе, Господи,/ Тройческое явися поклонение:/ Родителев бо глас свидетельствоваше Тебе,/ возлюбленнаго Тя Сына именуя,/ и Дух в виде голубине/ извествоваше словесе утверждение./ Явлейся Христе Боже// и мир просвещей, слава Тебе.

Кондак Крещения Господня.

Явился еси днесь вселенней,/ и свет Твой, Господи, знаменася на нас,/ в разуме поющих Тя:/ пришел еси и явился еси,// Свет Неприступный.

Величание.

Величаем Тя,/ Живодавче Христе,/ нас ради ныне плотию крестившагося/ от Иоанна// в водах Иорданских.

15 февраля (2 февраля по старому стилю)

Сретение Господа Нашего Иисуса Христа.



Тропарь Сретения Господня.

Радуйся, Благодатная Богородице Дево, из Тебе бо возсия Солнце Правды, Христос Бог наш, просвещаяй сущия во тьме. Веселися и ты, старче праведный, приемый во объятия Свободителя душ наших, дарующаго нам воскресение.

Кондак Сретения Господня.

Утробу Девичу освятивый Рождеством Твоим и руце Симеоне благословивый, якоже подобаше, предварив, и ныне спасл еси нас, Христе Боже, но умири во бранех жительство и укрепи люди, ихже возлюбил еси, Едине Человеколюбче.

Величание.

Величаем Тя,/ Живодавче Христе,/ и чтим Пречистую Матерь Твою,/ Еюже по закону ныне// принеслся еси в храм Господень.

11 марта (26 февраля по старому стилю)

Седмица 1-я Великого поста.

7 апреля (25 марта по старому стилю)

Благовещение Пресвятой Богородицы.



Тропарь Благовещения.

Днесь спасения нашего главизна и еже от века таинства явление: Сын Божий Сын Девы бывает, и Гавриил благодать благовествует. Темже и мы с ним Богородице возопиим: радуйся, Благодатная, Господь с Тобою.

Кондак Благовещения.

Взбранной Воеводе победительная, яко избавльшеся от злых, благодарственная восписуем Ти, раби Твои, Богородице, но, яко имущая державу непобедимую, от всяких нас бед свободи, да зовем Ти: радуйся, Невесто Неневестная.

Величание праздника Благовещения.

Архангельский глас/ вопием Ти, Чистая:/ радуйся,/ Благодатная,// Господь с Тобою.

Задостойник праздника Благовещения.

Благовествуй, земле, радость велию,// хвалите, небеса, Божию славу. Яко одушевленному Божию кивоту,/ да никакоже коснется рука скверных,/ устне же верных Богородице немолчно,/ глас Ангела воспевающе,/ с радостию да вопиют:/ радуйся, Благодатная,// Господь с Тобою.

21 апреля (8 апреля по старому стилю)

Вход Господень в Иерусалим.



Кондак праздника.

На престоле на Небеси,/ на жребяти на земли носимый, Христе Боже,/ Ангелов хваление/ и детей воспевание приял еси, зовущих Ти:// благословен еси, Грядый Адама воззвати.

Задостойник.

Бог Господь, и явися нам./ Составите праздник,/ и веселящеся приидите, возвеличим Христа,/ с ваиями и ветвьми, песньми зовуще:// благословен Грядый во имя Господа Спаса нашего.

Тропарь в Неделю Ваий.

Спогребшеся Тебе крещением, Христе Боже наш,/ безсмертныя жизни сподобихомся Воскресением Твоим,/ и воспевающе зовем:/ осанна в вышних,// благословен Грядый во имя Господне.

Кондак в Неделю Ваий.

На престоле на небеси, на жребяти на земли носимый Христе Боже, ангелов хваление, и детей воспевание приял еси зовущих Ти: благословен еси грядый Адама воззвати.

Величание.

Величаем Тя,/ Живодавче Христе,/ осанна в вышних,/ и мы Тебе вопием:// благословен Грядый во имя Господне.

28 апреля (15 апреля по старому стилю)

Светлое Христово Воскресение. Пасха.



Кондак Пасхи.

Аще и во гроб снизшел еси, Безсмертне,/ но адову разрушил еси силу/ и воскресл еси, яко победитель, Христе Боже,/ женам мироносицам вещавый: радуйтеся!/ и Твоим апостолом мир даруяй,// падшим подаяй воскресение.

Задостойник.

Ангел вопияше Благодатней:/ Чистая Дево, радуйся!/ И паки реку: радуйся! /Твой Сын воскресе/ тридневен от гроба,/ и мертвыя воздвигнувый:// людие, веселитеся. Светися, светися,/ новый Иерусалиме:/ слава бо Господня/ на тебе возсия./ Ликуй ныне/ и веселися, Сионе./ Ты же, Чистая, красуйся, Богородице,// о востании Рождества Твоего.

Стихира.

Воскресение Твое, Христе Спасе,/ всю просвети вселенную,/ и призвал еси Твое создание,// Всесильне Господи, слава Тебе.

Тропарь Пасхи.

Христос воскресе из мертвых,/ смертию смерть поправ// и сущим во гробех живот даровав..

Стихиры Пасхи.

Стих: Да воскреснет Бог и расточатся врази Его. Пасха священная нам днесь показася: Пасха нова святая: Пасха таинственная: Пасха всечестная: Пасха Христос Избавитель: Пасха непорочная: Пасха великая: Пасха верных: Пасха, двери райския нам отверзающая: Пасха, всех освящающая верных. Стих: Яко исчезает дым, да исчезнут. Приидите от видения, жены благовестницы, и Сиону рцыте: приими от нас радости благовещения Воскресения Христова: красуйся, ликуй и радуйся, Иерусалиме, Царя Христа узрев из гроба, яко жениха происходяща. Стих: Тако да погибнут грешницы от Лица Божия, а праведницы да возвеселятся. Мироносицы жены, утру глубоку предсташа гробу Живодавца, обретоша Ангела на камени седяща, и той, провещав им, сице глаголаше: что ищете Живаго с мертвыми? Что плачете Нетленнаго во тли? Шедше, проповедите учеником Его. Стих: Сей день, егоже сотвори Господь, возрадуемся и возвеселимся в онь. Пасха красная, Пасха, Господня Пасха! Пасха всечестная нам возсия. Пасха! Радостию друг друга обымем. О Пасха! Избавление скорби, ибо из гроба днесь, яко от чертога, возсияв Христос, жены радости исполни, глаголя: проповедите апостолом. Слава, и ныне, глас 5: Воскресения день, и просветимся торжеством, и друг друга обымем. Рцем: братие, и ненавидящим нас простим вся Воскресением и тако возопиим: Христос воскресе из мертвых, смертию смерть поправ и сущим во гробех живот даровав. Таже Христос воскресе: трижды. И поем сие многажды, дондеже целуют братия друг друга.

Часы Пасхи.

О часех Святыя Пасхи и всея Светлыя седмицы.Подобает ведати, яко от сего дне святыя и великия Недели Пасхи даже до субботы, часы сице поются. Иерей: Благословен Бог наш: Лик: Аминь. Христос воскресе из мертвых, смертию смерть поправ, и сущим во гробех живот даровав. трижды. Таже глаголем трижды: Воскресение Христово видевше, поклонимся Святому Господу Иисусу, Единому Безгрешному. Кресту Твоему покланяемся, Христе, и святое Воскресение Твое поем и славим: Ты бо еси Бог наш, разве Тебе иного не знаем, имя Твое именуем. Приидите, вси вернии, поклонимся святому Христову Воскресению: се бо прииде Крестом радость всему миру. Всегда благословяще Господа, поем Воскресение Его: распятие бо претерпев, смертию смерть разруши. Таже ипакои, глас 4, единощи: Предварившия утро яже о Марии, и обретшия камень отвален от гроба, слышаху от Ангела: во свете присносущнем Сущаго с мертвыми что ищете, яко человека? Видите гробныя пелены, тецыте и миру проповедите, яко воста Господь, умертвивый смерть: яко есть Сын Бога, спасающаго род человеческий. Таже кондак, глас 8, единощи: Аще и во гроб снизшел еси, Безсмертне, но адову разрушил еси силу, и воскресл еси яко Победитель, Христе Боже, женам мироносицам вещавый: радуйтеся, и Твоим апостолом мир даруяй, падшим подаяй воскресение. Таже и сей тропарь единощи: Во гробе плотски, во аде же с душею яко Бог, в раи же с разбойником, и на Престоле был еси Христе, со Отцем и Духом, вся исполняяй Неописанный. Слава: Яко Живоносец, яко рая краснейший, воистинну и чертога всякаго царскаго показася светлейший, Христе, гроб Твой, источник нашего воскресения. И ныне, Богородичен: Вышняго освященное Божественное селение, радуйся. Тобою бо дадеся радость, Богородице, зовущим: благословенна Ты в женах еси, Всенепорочная Владычице. Таже Господи, помилуй, 40. Слава, и ныне: Честнейшую Херувим: Именем Господним благослови, отче. Иерей: Молитвами святых отец наших: Мы же речем: Аминь. И паки глаголем подобне: Христос воскресе: трижды. Слава, и ныне: Господи, помилуй. Трижды. Благослови. И отпуст.

6 июня (24 мая по старому стилю)

Вознесение Господне.



Тропарь Вознесения Господня.

Вознеслся еси во славе, Христе Боже наш, радость сотворивый учеником, обетованием Святаго Духа, извещенным им бывшим благословением, яко Ты еси Сын Божий, Избавитель мира.

Кондак Вознесения Господня.

Еже о нас исполнив смотрение, и яже на земли соединив Небесным, вознеслся еси во славе, Христе Боже наш, никакоже отлучаяся, но пребывая неотступный, и вопия любящим Тя: Аз есмь с вами, и никтоже на вы.

Величание.

Величаем Тя,/ Живодавче Христе,/ и почитаем еже на Небеса/ с пречистою Твоею Плотию// Божественное вознесение.

Задостойник.

Величай, душе моя,// вознесшагося от земли на небо Христа Жизнодавца. Тя паче ума и словесе Матерь Божию,/ в лето Безлетнаго неизреченно рождшую,// вернии, единомудренно величаем.

16 июня (3 июня по старому стилю)

День Святой Троицы.



Тропарь праздника.

Благословен еси, Христе Боже наш,/ Иже премудры ловцы явлей,/ низпослав им Духа Святаго,/ и теми уловлей вселенную,// Человеколюбче, слава Тебе.

Кондак праздника.

Егда снизшед языки слия,/ разделяше языки Вышний,/ егда же огненныя языки раздаяше,/ в соединение вся призва,// и согласно славим Всесвятаго Духа.

Величание.

Величаем Тя,/ Живодавче Христе,/ и чтим Всесвятаго Духа Твоего,/ Егоже от Отца послал еси// Божественным учеником Твоим.

Задостойник.

Апостоли, сошествие Утешителя зряще, удивишася,// како в виде огненных язык явися Дух Святый. Радуйся, Царице,/ матеродевственная славо,/ всяка бо удобообращательная/ благоглаголивая уста ветийствовати не могут,/ Тебе пети достойно,/ изумевает же ум всяк Твое рождество разумети.// Темже Тя согласно славим.

7 июля (24 июня по старому стилю)

Рождество честного славного Пророка, Предтечи и Крестителя Господня Иоанна.



Тропарь Предтечи.

Память праведнаго с похвалами,/ тебе же довлеет свидетельство Господне, Предтече:/ показал бо ся еси воистинну и пророков честнейший,/ яко и в струях крестити сподобился еси Проповеданнаго./ Темже, за истину пострадав, радуяся,/ благовестил еси и сущим во аде Бога, явльшагося плотию,/ вземлющаго грех мира// и подающаго нам велию милость..

Кондак Предтечи.

Плотскаго Твоего пришествия убоявся,/ Иордан страхом возвращашеся;/ пророческое же служение исполняя,/ Иоанн трепетом спряташеся;/ Ангельския чини ужасахуся,/ зряще Тя, во струях плотию крещаема;/ и вси, сущии во тьме, озаряхуся,// воспевающе Тя, явльшагося и просветившаго вся.

Тропарь Предтечи.

От земли возсиявши, Предтечева глава/ лучи испущает нетления верным исцелений,/ свыше собирает множество Ангел,/ доле же созывает человеческий род// единогласную возсылати славу Христу Богу.

Кондак Предтечи.

Пророче Божий и Предтече благодати,/ главу твою, яко шипок священнейший, от земли обретше,/ исцеления всегда приемлем,/ ибо паки, якоже прежде,// в мире проповедуеши покаяние..

Тропарь Предтечи.

Яко Божественное сокровище, сокровенное в земли,/ Христос откры главу твою нам, пророче и Предтече./ Вси убо, сошедшеся в сея обретение,/ песньми богоглаголивыми Спаса воспоим,// спасающа нас от тления молитвами твоими.

Кондак Предтечи.

Светоявленный и Божественный в мире столп,/ солнца светильник,/ Предтеча, главу светоносную и Божественную свою/ показавый в концех,/ освящает той верно покланяющихся/ и взывающих:// Христов премудрый Крестителю, спаси всех нас.

Тропарь Предтечи.

Память праведнаго с похвалами,/ тебе же довлеет свидетельство Господне, Предтече:/ показал бо ся еси воистинну и пророков честнейший,/ яко и в струях крестити сподобился еси Проповеданнаго./ Темже за истину пострадав, радуяся,/ благовестил еси и сущим во аде Бога, явльшагося плотию,/ вземлющаго грех мира// и подающаго нам велию милость.

Кондак Предтечи.

Предтечево славное усекновение/ смотрение бысть некое Божественное,/ да и сущим во аде Спасово проповесть пришествие./ Да рыдает убо Иродия,/ беззаконное убийство испросивши:/ не закон бо Божий, ни живый век возлюби,// но притворный, привременный.

Величание.

Величаем тя,/ Крестителю Спасов Иоанне,/ и почитаем вси/ честныя твоея главы// усекновение.

Молитва Предтече и Крестителю Господню Иоанну.

Крестителю Христов, проповедниче покаяния, кающагося не презри мене, но, совокуплялся с вои Небесными, молися ко Владыце за мене, недостойнаго, унылаго, немощнаго и печальнаго, во многия беды впадшаго, утружденнаго бурными помыслы ума моего. Аз бо есмь вертеп злых дел, отнюдь не имеяй конца греховному обычаю, пригвожден бо есть ум мой земным вещем. Что сотворю, не вем, и к кому прибегну, да спасена будет душа моя, токмо к тебе, святый Иоанне, благодати тезоимените, яко тя пред Господем, по Богородице, вем больша быти рожденных всех: ты бо сподобился еси коснутися верху Царя Христа, вземлющаго грехи мира, Агнца Божия. Егоже моли за грешную мою душу, да поне отныне, в первыйнадесять час, понесу тяготу благую и прииму мзду с последними. Ей, Крестителю Христов, честный Предтече, крайний пророче, первый во благодати мучениче, постников и пустынников наставниче, чистоты учителю и ближний друже Христов, тя молю, к тебе прибегаю, не отрини мене от твоего заступления, но возстави мя, падшагося многими грехи, обнови душу мою покаянием, яко вторым крещением, понеже обоего начальник еси, крещением омывали грех, покаяние же проповедуяй во очищение когождо дел скверных; очисти убо мя, грехми оскверненнаго, и понуди внити, аможе ничто же скверно входит, в Царствие Небесное. Аминь.

12 июля (29 июня по старому стилю)

Славных и всехвальных первоверховных апостолов Петра и Павла.



Тропарь апостолов.

Апостолов первопрестольницы/ и вселенныя учителие,/ Владыку всех молите/ мир вселенней даровати// и душам нашим велию милость.

Кондак апостолов.

Твердыя и боговещанныя проповедатели,/ верх апостолов Твоих, Господи,/ приял еси в наслаждение благих Твоих и покой:/ болезни бо онех и смерть приял еси паче всякаго всеплодия,// Едине, сведый сердечная.

19 августа (6 августа по старому стилю)

Преображение Господа Бога и Спаса нашего Иисуса Христа.



Тропарь праздника.

Преобразился еси на горе, Христе Боже,/ показавый учеником Твоим славу Твою,/ якоже можаху,/ да возсияет и нам, грешным,/ Свет Твой присносущный/ молитвами Богородицы,// Светодавче, слава Тебе.

Кондак праздника.

На горе преобразился еси,/ и якоже вмещаху ученицы Твои,/ славу Твою, Христе Боже, видеша,/ да егда Тя узрят распинаема,/ страдание убо уразумеют вольное,/ мирови же проповедят,// яко Ты еси воистинну Отчее сияние.

Величание.

Величаем Тя,/ Живодавче Христе,/ и почитаем пречистыя плоти Твоея/ преславное// преображение.

28 августа (15 августа по старому стилю)

Успение Пресвятой Владычицы нашей Богородицы и Приснодевы Марии.



Тропарь праздника.

В рождестве девство сохранила еси,/ во успении мира не оставила еси, Богородице,/ преставилася еси к животу,/ Мати сущи Живота,// и молитвами Твоими избавляеши от смерти души наша.

Кондак праздника.

В молитвах Неусыпающую Богородицу/ и в предстательствах непреложное упование/ гроб и умерщвление не удержаста:/ якоже бо Живота Матерь/ к животу престави// во утробу Вселивыйся приснодевственную.

Величание.

Величаем Тя,/ Пренепорочная/ Мати Христа Бога нашего,/ и всеславное славим// успение Твое.

11 сентября (29 августа по старому стилю)

Усекновение главы Пророка, Предтечи и Крестителя Господня Иоанна.



Тропарь Предтечи.

Память праведнаго с похвалами,/ тебе же довлеет свидетельство Господне, Предтече:/ показал бо ся еси воистинну и пророков честнейший,/ яко и в струях крестити сподобился еси Проповеданнаго./ Темже за истину пострадав, радуяся,/ благовестил еси и сущим во аде Бога, явльшагося плотию,/ вземлющаго грех мира// и подающаго нам велию милость.

Кондак Предтечи.

Предтечево славное усекновение/ смотрение бысть некое Божественное,/ да и сущим во аде Спасово проповесть пришествие./ Да рыдает убо Иродия,/ беззаконное убийство испросивши:/ не закон бо Божий, ни живый век возлюби,// но притворный, привременный.

Величание.

Величаем тя,/ Крестителю Спасов Иоанне,/ и почитаем вси/ честныя твоея главы// усекновение.

21 сентября (8 сентября по старому стилю)

Рождество Пресвятой Владычицы нашей Богородицы и Приснодевы Марии.



Тропарь праздника.

Рождество Твое, Богородице Дево,/ радость возвести всей вселенней:/ из Тебе бо возсия Солнце Правды, Христос Бог наш,/ и, разрушив клятву, даде благословение,// и, упразднив смерть, дарова нам живот вечный.

Кондак праздника.

Иоаким и Анна поношения безчадства/ и Адам и Ева от тли смертныя свободистася, Пречистая,/ во святем рождестве Твоем./ То празднуют и людие Твои,/ вины прегрешений избавльшеся,/ внегда звати Ти:// неплоды раждает Богородицу и Питательницу Жизни нашея.

Величание.

Величаем Тя,/ Пресвятая Дево,/ и чтим святых Твоих родителей,/ и всеславное славим// рождество Твое.

27 сентября (14 сентября по старому стилю)

Воздвижение Честного и Животворящего Креста Господня.



Тропарь Воздвижения Честнаго и Животворящего Креста.

Спаси, Господи, люди Твоя/ и благослови достояние Твое,/ победы на сопротивныя даруя// и Твое сохраняя Крестом Твоим жительство.

Кондак Воздвижения Честнаго и Животворящего Креста.

Вознесыйся на Крест волею,/ тезоименитому Твоему новому жительству/ щедроты Твоя даруй, Христе Боже,/ возвесели нас силою Твоею,/ победы дая нам на сопостаты,/ пособие имущим Твое оружие мира,// непобедимую победу.

Величание.

Величаем Тя,/ Живодавче Христе,/ и чтим Крест Твой святый,/ имже нас спасл еси// от работы вражия.

Задостойник.

Величай, душе моя,// Пречестный Крест Господень. Таин еси, Богородице, рай,/ невозделанно возрастивший Христа,/ Имже крестное живоносное на земли насадися Древо./ Тем, ныне возносиму,// покланяющеся Ему, Тя величаем.

14 октября (1 октября по старому стилю)

Покров Пресвятой Владычицы нашей Богородицы и Приснодевы Марии.



Тропарь Покрова Пресвятой Богородицы.

Днесь, благовернии людие, светло празднуем,/ осеняеми Твоим, Богомати, пришествием,/ и к Твоему взирающе пречистому образу, умильно глаголем:/ покрый нас честным Твоим Покровом/ и избави нас от всякаго зла,/ молящи Сына Твоего, Христа Бога нашего,// спасти души наша.

Кондак Покрова Пресвятой Богородицы.

Дева днесь предстоит в церкви/ и с лики святых невидимо за ны молится Богу,/ Ангели со архиереи покланяются,/ апостоли же со пророки ликовствуют:// нас бо ради молит Богородица Превечнаго Бога.

Величание.

Величаем Тя,/ Пресвятая Дево,/ и чтим Покров Твой святый:/ Тя бо виде святый Андрей на воздусе,// за ны Христу молящуюся.

4 декабря (21 октября по старому стилю)

Введение во храм Пресвятой Владычицы нашей Богородицы и Приснодевы Марии.



Тропарь праздника.

Днесь благоволения Божия предображение/ и человеков спасения проповедание:/ в храме Божии ясно Дева является/ и Христа всем предвозвещает./ Той и мы велегласно возопиим:/ радуйся, смотрения// Зиждителева исполнение.

Кондак праздника.

Пречистый храм Спасов,/ многоценный чертог и Дева,/ священное сокровище славы Божия,/ днесь вводится в дом Господень, благодать совводящи,/ Яже в Дусе Божественном,/ Юже воспевают Ангели Божии:// Сия есть селение Небесное.

Величание.

Величаем Тя,/ Пресвятая Дево,/ Богоизбранная Отроковице,/ и чтим еже в храм Господень// вхождение Твое.

Задостойник.

Ангели, вхождение Пречистыя зряще, удивишася,// како Дева вниде во святая святых. Яко одушевленному Божию кивоту,/ да никакоже коснется рука скверных,/ устне же верных Богородице немолчно,/ глас Ангела воспевающе, с радостию да вопиют:// истинно вышши всех еси, Дево Чистая.



•  В Начало  •



ИНФО

Икона сегодняшнего дня









Цитата:


Православные праздники